Aprè nòt CODEVI te pibliye semèn pase a kote l fè konnen li pa anvizaje pran tè pou fè ekstansyon Pak Endistriyèl la jan enfòmasyon kap sikile yo ta vle fè kwè sa, paske tè sa yo rezève pou fè agrikilti, menm si li mande leta Ayisyen pou l pran responsabilite l nan dosye a, Majistra Wanament la Ocelite Destiné ki tap entèvni nan emisyon “Koze Mande Ti Chèz” sou Radyo Kanari 98.3 FM samdi maten 27 Out 2022 a di li satisfè akoz desizyon CODEVI pran an.
Yon lòt kote, Majistra Ocelite denonse konpòtman yon gwoup moun li di l konstate ki kòmanse konstwi nan tè agrikòl ki mete CODEVI fas ak popilasyon an. Li fè konnen se gras ak entèvansyon li, sitwayen sa yo ki te deside poze aksyon malonèt sa a sou tè anba Gaya san otorizasyon Meri a te oblije kanpe. Majistra Ocelite deklare pa tap genyen okenn koyezyon nan batay lap Mennen fas ak tout moun ak enstitisyon tankou CODEVI ak CONADO ki vle pran tè agrikòl yo pou mete beton sou yo si li ta va aksepte sitwayen yo konstwi nan espas sa a.
Pandan l tap pale de kesyon ensekirite a kap vale teren nan zòn Gaya, Majistra Ocelite lanse yon apèl a tout sitwayen pesib ak onèt kap viv nan kominote Gaya pou mande yo pote konkou bay otorite lapolis ak lajistis pou pèmèt yo frennen machin ensekirite an mach nan zòn nan, yon fason pou pita pa pitris. Li kontinye pou l di si anyen pa fèt rapidman pou kwape zèfèyis yo, se bandi kap genyen pou otorize moun yo vle pase nan zòn sa a, pa lontan.
Sou bò pa li, mèt Simpson Charles Amazan ki tap patisipe nan menm emisyon an, te pwofite bay opinyon li sou lanmò Luckendy François, yon jèn gason 18 lane ki te viktim anba katouch sou wout Gaya a lendi 22 Out 2022 a byen bonè nan maten pandan l ta pral travay nan Pak Endistriyèl la/CODEVI.
Selon mèt Amazan ki kalifye sak pase a kòm yon aksidan nan travay, CODEVI ta dwe enplike nan dedomaje fanmi Viktim lan pandan otorite konsène yo ap kontinye mennen bon jan ankèt pou rive pase kòd nan kou otè ak konplis krim nan.
Otè : Seldon Robinson
Etidyan finisan CEPCOM
Aucun commentaire:
Enregistrer un commentaire