Gwo refleksyon fèt nan komin kapotiy pou ranfòse sosyete sivil la.

Ayè Jedi 25 dawout 2022 a, kòdinasyon òganizasyon pou devlòpman kapotiy (KODEK) te òganize yon atelye refleksyon nan lokal Idéal Night Club nan komin Kapotiy avèk yon latriye reprezantan òganizasyon kominotè de baz (OKB) ki soti nan premye ak dezyèm seksyon kominal kapotiy ak nan bouk la nan lide pou yo te kapab reflechi nan tèt kole avèk divès notab, reprezantan kèk legliz ak lekòl sou tèm "sitwayènte aktiv ak sosyete sivil fò."

Aktivite sa a te rive posib gras ak bourad lajan SJM-Ayiti nan Kad pwojè BD a.

Fòk nou di plizyè patisipan te pran moso lapawòl nan kòmansman aktivite a pa rapò a kantite moun ki te reponn a envitasyon an yo jije ki pat anpil. Pami yo, Madam Annette St-Hilbert ki te montre posibilite ki genyen pou se pwoblèm frè deplasman ki anpeche plis moun vini nan aktivite a. 

Sou bò pal li Hurgue Dumorné kwè popilasyon an te manke bay enpòtans a aktivite a pandan l te fè remake li pa posib pou yon kominote ki genyen 22 mil moun ap viv ladann, pou espas la pa ranpli nan kad yon gwo aktivite kap fèt gratis nan benefis komin nan. Li kontinye pou l lonje dwèt li byen long sou otorite lokal yo ki pat prezan nan aktivite a. 

Pilwen, Monel Charles ak Villard Sony ki tap patisipe nan atelye a tou, te pwopoze pou genyen atelye ki rive fèt epi estrikti ki monte nan chak blòk yo, yon fason pou yo rive mete kanpe yon sèlil refleksyon ki fò tout bon vre pou fasilite avansman ak devlòpman komin kapotiy.

Aprè  tout entèvansyon sa yo, prezidan KODEK la mesye Quesnel Brutus avèk animatris SJM-Ayiti a Madam Elisette Raymond te pran desizyon pou yo te fòme 3 gwoup ak patisipan yo kote chak gwoup te genyen pou yo te reflechi sou pwen sila yo:

-Kisa yon sitwayen ye?

-Ki wòl ak enpòtans yon sosyete sivil?

-Kisa sitwayènte aktiv la vle di?

-Lè yon moun pwal kandida pou yon pòs elèktif kisa l bezwen?

Apre travay refleksyon an gwoup la, yon rapòtè te pase devan pou prezante travay la. Akoz kèk bagay fasilitatè yo te ajoute nan moman plenyè a avèk kèk echanj ant patisipan yo, moun yo te montre yo aprann anpil bagay nan okazyon an. Fasilitatè yo ki pwomèt aktivite sa ap kontinye, fè konnen yap genyen pou yo enfòme aktè yo nan yon dat ki pa twò long, kilè ak ki kote yap genyen pwochen randevou a.

Kesyon nap poze, nan yon atelye ki si enpòtan, poukisa okenn otorite lokal pat patisipe ? Eske yo pat jwenn envitasyon an bonè ? Eske se bagay ki gen rapò ak lajan sèlman ki enterese otorite yo ? Eske se fason otorite yo ap mal jere komin nan ki koz yo pè chita ak sosyete sivil la?

Antouka, nap swiv…

Otè: Charles wilberto

Jounalis kòrèspondan Liberté-Infos /Ansyen etidyan CEPCOM