KAPOTIY-FÒMASYON:Federasyon Jèn Kapotiy (FEJECA/FEJEKA) ak SJM-Ayiti ap envesti nan fòmasyon jenès la.

Jedi 4 Dawout 2022 a, Federasyon Jèn Kapotiy (FEJECA/FEJEKA) reyalize yon gwo jounen fòmasyon nan domèn atizanal pou 30 jèn fi ak jèn gason nan lokal li ki twouve l nan komin Kapotiy/depatman nòdès peyi Dayiti.

Aktivite sa a ki jwenn bourad lajan SJM-Ayiti nan kad yon pwojè ki rele « tranzisyon vè agwo-ekoloji, souverènte alimantè, rezilyans ekonomik ak sosyete sivil revandikativ » ki limenm jwenn finansman Broederlijk Delen (BD) ki se yon ONG entènasyonal, ap dire 2 jou. Fòmasyon sa a pral pèmèt jèn yo aprann kòman pou yo kapab fè Sandal, Valiz, Braslè, Kolye, elatriye. 

Gras ak gwo estrateji fòmatè yo mete kanpe nan okazyon an, jèn yo ap genyen chans rive metrize plizyè teknik ki kapab ede yo bay bon jan rezilta sou teren an aprè 2 jou fòmasyon an. Swit ak fòmasyon sa a, jèn yo pral ede komin Kapotiy nan divès nivo selon temwanyaj kèk responsab:

Yo pral kontribiye nan rediksyon dechè nan komin nan gras ak aktivite resiklaj yo pral fè;

Yo pral kontribiye nan rediksyon lamizè nan komin nan gras ak lajan yo pral fè nan pwodiksyon yo;

Yo pral kontribiye nan rediksyon delenkans nan komin nan gras ak okipasyon yo nan pwodiksyon. 

Finalman, pwomotris SJM-Ayiti kap travay sou pwojè sa a, Madam Raymond Elisette, temwaye gwo satisfaksyon li aprè premye jounen fòmasyon an. Li fè konnen enstitisyon patnè a, FEJEKA kapab toujou konte sou sipò SJM-Ayiti nan lide pou l kontinye akonpanye jenès la nan domèn fòmasyon. Pi lwen, madam Elisette di li konsidere aktivite fòmasyon an kòm yon gwo zouti ki kapab ede jèn yo mennen konba lavi a nan peyi Dayiti. 

Philomé Mathieu