Ayiti/Kilti: Estaf LAKOU VERITE nan Wanament te patisipe an gwo plan nan fèt Bedou/komin Ferye ane sa a.

Estaf LAKOU VERITE ki genyen nan tèt li Ougan Ocelite Destiné ak Apantè Pirame te reyalize anpil aktivite kiltirèl ayè Samdi 30 Jiyè 2022 a nan lokalite Bedou, komin Ferye.

Aktivite sa yo te fèt nan lide pou te kapab pote sipò bay komite òganizatè fèt Patwonal zòn nan, espesyalman Alinx Joseph ki toujou pèmèt pèleren yo fete avèk Sen-Patwon yo Saint-Ignace de Loyola ak Mèt Granbwa Illé ki se bòs mistik kanton an. 

Bal gratis avèk yon gwoup vodou ki te soti nan Wanament ki rele PLEZI VODOU DAYITI, tounwa foutbòl tipoto, kous kouri nan Sak, konkou dans vodou se kèk pami aktivite kiltirèl estaf LAKOU VERITE a te òganize pou te kreye anbyans nan fèt la. 

Ti-Chelsi ak Ti-Real, se non 2 ekip ki te rive nan final konpetisyon sa a ki te genyen ladann 4 ekip. Nap souliye pou ou se Ti-Chelsi ki te ranpòte final la 1-0 nan seyans tire nan gòl apre tan reglemantè a te fini zewo gòl nan chak kan. 

Estaf LAKOU VERITE a te remèt yon anvlòp chaje ak chak finalis yo, anplis yon Balon tou nèf li te bay ekip Ti-Chelsi a ki se chanpyon tounwa a.

Nap raple, estaf LAKOU VERITE a pat sèlman reyalize aktivite sa yo, li bay anpil kòb a dives pèleren oubyen moun zòn nan ki te sou plas. Benefisyè yo te chwazi pa chans nan piblik la, majorite nan yo se te tigranmoun ak timoun. 

Inisyativ sa a te pran aprè 3 patisipasyon estaf LAKOU VERITE a nan fèt Bedou kote l te konstate manke aktivite pou bay plezi a pèleren yo pou pèmèt yo pase plis tan nan zòn nan, olye yo kontinye fè touche-tounen/rantre-soti. 

Chantè prensipal Djaz PLEZI VODOU DAYITI a, Geffrard Julien alyas Djo The Best te mete anpil animasyon avèk konplisite tanbouyè-sanmba Djaz la Mackeson sitou avèk mizik (Devwa Demwazèl la, Peyi a, Kafou Gran Chemen). 

Lapè, Linite ak Viv Ansanm, se kèk pami bèl mesaj atis Djo The Best te bay nan moman poz yo. Li te pwofite mande popilasyon an pou sonje orijin yo kòm vodouyizan epi pote kole pou voye kilti peyi a monte. 

Ocelite Destiné ki te prezan nan aktivite a te pwofite mande popilasyon an pou kontinye kore kilti peyi a ki se vodou. Li pwomèt pèleren yo LAKOU VERITE ap kontinye patisipe pou chanje eskanp figi fèt Mèt Granbwa Illé nan Bedou.

Selon temwanyaj Alinx Joseph, yon manb nan komite a ki te pale avèk Jounal “Liberté Infos’’, depi Depite Elience Petit-Frère alyas Polo te fin mouri, sa fè plizyè ane, pèsonn pa janm voye je gade komite a. Se premye fwa yo jwenn yon sipò nan òganizasyon fèt la. Li te pwofite felisite, di mèsi a estaf LAKOU VERITE a li di ki leve nivo fèt la ane sa a.

Nap raple, yon gwo mès te chante Dimanch maten 31 jiyè 2022 anba yon Tant nan espas ki rezève pou konstriksyon Chapèl Sen-Patwon zòn nan Saint-Ignace de Loyola. 

Philomé Mathieu