Twalèt piblik nan mache kominal Wanament la pa fonksyone depi 10 mwa : kisa ki lakoz? Ki kote moun k ap frekante espas la fè bezwen yo?

 

Nan kad yon virewon jounalis "Liberté-Infos" yo te fè nan mache kominal Wanament, Samdi 23 Jiyè 2022 pase a, enfòmasyon yo rekèyi nan temwanyaj kèk machann ak lòt moun ki toujou frekante espas mache a, twalèt piblik ki nan mache kominal lan genyen 10 mwa depi li pa fonksyone akòz neglijans ak ensousyans otorite yo nan Meri a.

Nan istwa peyi dayiti, menm twalèt piblik se pat bagay ki janm pou jere. Egzanp lan klè nan tout enstitisyon nan peyi a, twalèt yo toujou nan yon eta deplorab kote yo pa reponn a okenn kritè sanitè ak ijynenik.  Ni anndan lekòl prive anpil moun ap rele gwo lekòl yo, ni anndan lekòl Leta yo.  

Souvan, jeran lakou ki plase pou asire bon fonskysònman espas la, se yon politisyen (senatè,depite, majistra....) ki mete l. Pafwa, menm nan men direktè lekòl la li pa vle pran lòd. Anndan inivèsite Leta a menm, kote nou swadizan di n ap fòme moun pou sosyete a, sa pi grav toujou. Pou biwo Leta yo, soti nan Meri yo pase nan Tribinal yo jouk rive nan Direksyon jeneral ak Ministè yo se menm konsta yo. Se klè gen yon pwoblèm grav nan edikasyon ayisyen sou fason yo dwe jere espas twalèt yo.

Nan ka mache piblik Wanament lan, anplis gwo pil fatra ak ma dlo sal k ap degaje move lodè san konte zannimo tankou kochon, kabrit, bèf k ap pwomennen sou machann ak machandiz yo, gen gwo difikilte pou moun k ap frekante espas la sitou machann yo ki fè jounen nan mache a jwenn yon kote pou fè bezwen yo.

Daprè responsab twalèt piblik ki nan mache kominal Wanament, mesye Wensley Joseph, rezon ki lakoz twalèt la gen 10 mwa li pa fonksyone, se ta yon tiyo PVC ki bouche. Donk, lè moun yo fin fè bezwen yo, pwoblèm sa anpeche dechè a desann nan fòs pèdi a. Sitwayen an kontinye pou l di malgre li pa janm touche depi anviron 5 lane, se limenm ki te toujou achte bale, mòp ak dezenfektan pou l pwòpte twalèt la. Li pwofite lanse yon S.O.S bay Meri Wanament pou mande l vin ranje twalèt la paske se nan sachè nwa moun yo ap fè bezwen yo epi voye l nan lakou mache a. Li kwè aksyon sa a kapab genyen gwo konsekans sou sante popilasyon an.

Pi lwen, mesye Wensley Joseph alyas "Timole pa Mouli", mande lamèri pou peye li 5 lane travay li. Nap pwofite raple w, se chak samdi responsab mache kominal Wanament la fè resèt nan non lamèri e fòse ti machann yo peye anba gwo presyon e menm move pawòl pimanbouk. 

Kilè rèsponsab lamèri yo ap gen pou fè entevansyon pou repare twalèt yo? Eske se konsa responsab sa yo jere twalèt lakay yo? Eske yo pa panse twalèt kap jete nan sachè anndan mache a kapab rive sou tab lakay yo paske se la fanmiy yo achte? 

Se tout kesyon sa yo jounal "Liberté-Infos" ta swete jwenn repons yo prese, prese.

Pierre Dieusel: Jounalis/kòrèspondan/Etidyan CEPCOM