Fineray Majistra adjwen komin kapotiy lan Mesye Ermane Pétiomard, chante maten samdi 9 Jiyè 2022 a nan Pawas Monkamèl nan Kapotiy.

Nan sousi pou te rann yon dènye omaj byen merite a Majistra annapre Komin Komin kapotiy la Mesye Ermane Pétiomard ki te mouri sibitman sou kabann lopital nan Santiago nan Repiblik Dominkèn dimanch pase a, fanmi defen an te reyalize yon gwo seremoni relijyez jodi samdi 9 Jiyè 2022 a nan Pawas Monkamèl nan Kapotiy.

Nan okazyon sa a, divès otorite nan leta a te soti toupatou pou vin pote sipò bay Konsèy Minisipal Kapotiy la avèk fanmi defen an. 

Pami otorite sa yo, nou te remake prezans ansyen Depite Sikonskripsyon Kapotiy-Montòganize a Dr Frist Adrien, Visdelege awondisman Wanament la Mesye Arold Joseph, Majistra komin Montòganize a Mesye Sylvio Micanor, Majistra komin Fòlibète a Mesye Louis-Jacques Etienne, Majistra Komin Wanament la Mesye Luma Démétrius, ansyen Senatè depatman Nòdès la Mesye Ronald Larêche, Kazèk ak Azèk pwemye ak dezyèm seksyon komin kapotiy, Delege vil komin Kapotiy yo, reprezantan Lapolis Nasyonal, Sante Piblik  avèk estaf Tribinal Lapè komin Kapotiy lan, elatriye.

Nan diskou sikonstans li, Prezidan Konsèy Minisipal komin Kapotiy la, Mesye Eugène Adrien fè konnen poko te janm genyen yon Majistra an fonksyon ki mounri nan komin Kapotiy. Li te tou pwofite raple kòman Majistra Ermane se te konn fonksyone avèk ekip la nan benefis kominote a.

« Se pwemye fwa yon Majistra an fonksyon mouri nan komin nan.  Majistra Ermane Pétiomard te yon bon kolaboratè,  li te toujou fè tout sa ki depann de li pou avansman komin nan.»  

Yon lòt kote, Direktè  Jeneral Meri Kapotiy lan Mesye Lahisner Pierre ki te pran moso lapawòl nan okazyon an, te montre l genyen gwo tristès kap travèse l. Li fè konnen lanmò sa a se yon gwo pèt pou tout kominote a. Li raple dènye konfidans defen an te fè li.« Mwen pèdi anpil. E, dènye fwa mwen te pale avèk Majistra Ermane, li te dim li gagote paske l dòmi, li wè l nan simityè a.»

Divès kad Meri Kapotiy lan ak lòm Majistra komin nan, Eugène Adrien, Micheline Exavier ak reprezantan plizyè òganizasyon kominotè de baz te akonpanye fanmi Majistra Ermane.

Nap siyale, se jouk nan simityè Welsh fanmi an t al antere kadav la, malgre fineray la te chante nan sant vil kapotiy.

Wilberto Charles

Jounalis/Korespondan