Nòdès-Wanament//Manif : Lidè Pitit Desalin nan Moïse Jean-Charles ak Popilasyon an te manifeste nan vil Wanament kont sitiyasyon kawotik peyi a.

Nan lide pou mande depa premye minis Ariel Henry, pou souteni e mande ratifikasyon KTPS la kise Konsèy Tranzisyon Pèp Souveren an, pou di non ak ogmantasyon  pri gaz la, di aba ensekirite, aba lavi chè, aba Etazini viv larisi, e desann dola a, plizyè milye moun te pran lari nan vil wanament sou inisyativ Kòdinasyon Kominal Mouvman Jenès Pitit Desalin (MOJPID) ak lidè pati politik Pitit Desalin nan Moïse Jean-Charles Jounen Jedi 10 Novanm 2022 a. 

Manisfestan yo te pakouri divès ri nan vil Wanament. Pandan tout pakou a, yo tap chante e voye anpil pawòl piman bouk.  Aba Etazini, viv Larisi, se kèk pami gwo mesaj manifestan yo tap bay nan okazyon an pandan yo te tou pwofite mande Etazini pou l sispann sipòte  PM Ariel Henry. 

Jan anpil obsèvatè te kapab remake sa, pandan manifestasyon sa a, drapo peyi Larisi ak drapo nwa e wouj pati politik Pitit Desalin nan pat sispan flote. 

Li te anviwon 3 zè konsa, aprè manifestan yo ak lidè Moïse Jean-Charles te fin pakouri divès ri nan vil la, Moïse Jean-Charles te deside bay yon pwen depwès nan Baz Boulòs nan zòn Gaya, kote li pwomèt popilasyon an lap batay pou  yo e avèk yo jiskobou, pou jwenn depa PM lan, fini ak sistèm peze souse a, mete an aplikasyon KTPS, chanje kondisyon lavi pèp la, desann dola a, epi rezoud pwoblèm ensekerite a. Lidè Pitit Desalin nan te tou pwofite felisite moun wanament pou lanmou yo manifeste anvè li.

Tou swit aprè pwen de pwès la, manifestan yo te pran direksyon Gran Ri Espanyòl la, e se la aktivite a ta pral rive nan bout li.

Nap raple, manifestasyon an te dewoule san grav ensidan, apa yon jèn gason nou pat rive mete non sou vizaj li, ki  te blese nan bra goch li pandan manifestasyon an tap pase nan zòn Gaya. Ensidan sa a te rive akoz plizyè jèn gason te opoze a pasaj minifestasyon an nan kanton an pou rezon pèsonèl yo. 

Nap souliye, nan zòn Mapou, plizyè jèn gason te tante tire wòch nan moman manifestan yo ta pral rankontre ak Moïse Jean-Charles, men sitiyasyon sa a te arive  aranje gras ak  detèminasyon e taktik popilasyon avèk sipò lapolis Nasyonal (PNH). 

Otè : Thoribe Dieufort, Etidyan CEPCOM

Jounalis Repòtè Liberté Infos.