Kijan rèsponsab legliz yo fè panse ak yon bagay konsa? Eske tèt moun sa yo dwat? Depi kilè legliz katolik te konn fèt nan bout chanm kay oswa anba tonnèl? Eske legliz ka patisipe nan lejitime menas ak entimidasyon? Eske se tout bon legliz katolik pèdi prestij li?
Se kèk pami kesyon kap poze depi anviwon yon mwa kote yon gwo konfli eklate ant popilasyon wanamentèz lan ak rèsponsab pawas "Immaculée Conception" nan lokalite Mankèt akoz rèsponsab pawas sa ta vle pran yon pati nan "Parc-de-Jeu" a pou konstwi yon legliz. Anpil vwa nan sosyete a leve pou manifeste mekontantman yo kont inisyativ sa pou plizyè rezon: si pou kèk moun pa gen konpatibilite ant yon sant lwazi ak yon lye adorasyon oubyen relijyez;pou kèk lòt,espas la pa menm ase si ta gen pou fè esktansyon pak la oswa mete lot disiplin.
Malgre tout opozisyon sa yo,sa pa anpeche gen yon gwoup moun ki reklame tèt yo kòm komite pastoral pawas "Immaculée Conception" an ki kontinye ap mete presyon pou fòse otorite lokal yo asepte konstriksyon legliz la anndan Parc-de-Jeu a. Plizyè notab nan vil wanament ki nan sektè aktivite diferan (ki pa vle non site nan atik sa) opoze ak pwojè sa e yo prè pou kolabore ak legliz katolik pou jwenn yon lòt espas kòm altènativ. Anpil rèsponsab èspò,manb lapwès ak sosyete sivil nan depatman Nòdès la gen yon sèl pozisyon sou dosye sa: " Mankèt pa dwe pèdi pawas la, ni nou pa dwe pèdi Parc-de-Jeu a tou,ke nou deja genyen. Sa ki enpotan se jwenn yon lòt espas san pèdi tan pou legliz la konstwi."
"Si se maraton kap fèt pou achte yon tèren mw dispoze 50mil goud kòm kontribisyon familyal paske fanmiy mwen se manb legliz katolik yo ye. Si se pou jwenn yon lòt espas, antake majistra, mwen dispoze poum bay tan'm atravè yon komisyon miks pou chèche e idantifye yon tèren apwopriye nan zòn lan pou konstwi legliz la. E mw prè pou'm patitisipe nan tout demach yo pou rive deklare espas nou jwenn lan "itilite piblik". Men kanta pou espas "Parc-de-Jeu a pa gen okenn posibilite pou mwen asepte yon bagay konsa fèt",sa se pozisyon Ocelite Destiné kise manb konsèy egzekitif enterimè komin wanament.
Pandan tan,gen jèn nan lokalite Mankèt ki ta sanble lèse yo manipile pa kèk politisyen pou fè menas ak entimidasyon sou moun ki abite nan zòn lan ki gen pozisyon kontrè ak konstriksyon legliz la nan espas "Parc-de-Jeu a. Pami moun ki viktim de menas sa yo,nou ka site:Mathieu Philomé ak tout fanmiy li. Viktim lan fè konnen presyon ak entimidasyon pa ka anpeche l defann enterè Mankèt paske se la li fèt e se la li grandi.
Anpil moun jodia ki vle fè kwè ke yap defann enterè Mankèt se yo ki te al chèche lapolis lè mwen tap batay pou Parc-de-Jeu a te fini e pou twonson wout la te fèt paske li nan move eta pandan te gen bri ki tap kouri fè konnen ke kòb konstriksyon Pak la te fè fon. Epòk sa moun sa yo te chèf,se enterè pouvwa yo,yo tap jere. Men lè lapolis te rive nan zòn lan,yo te jwenn se yon gwoup jèn ki ak pankad nan men,ki tap fè revandikasyon yo pase pasifikman. Yo te bay nou lanmen yo ale malgre ansyen vis delege Ersnt Exalus te di yo se te yon gwoup gang kap ransone moun kap pase nan zòn lan",sa se deklarasyon Mathieu Philomé kise Jounalis e direktè jeneral "Liberté-Infos"(yon jounal an liy)
Nap souliye ke Parc-de-Jeu Mankèt la te konstwi sou Prezidan Michel Martelly e li te inogire nan dat 19 Novanm 2013. Se te yon rekonpans ak atachman depite nan epòk la Luckner Noël (YONYON). Alòske se menm YONYON sa jodia ki pami moun ki dakò pou legliz konstwi nan Parc-de-Jeu a ( enkoyerans total). Toutfwa fòk di tou ke Pak la nan yon trè movèz eta akoz travay mentnans yo ki pa fèt malgre komisyon kap jere espas la ta reklame gwo sòm lajan pou chak aktivite kap fèt ladanl,daprè kèk sitwayen nan zòn lan.
Accilien Jackenson "Maitre-Z"
Agronome/Politologue/Journaliste
Aucun commentaire:
Enregistrer un commentaire