Wanament/Vyolans: SJM-Ayiti/Solidarite Fwontalye soti nan silans li, 5 jou aprè kèk swadizan manifèstan te fin fè zak kraze brize ak piyaj nan biwo Wanament la.

Nan yon nòt pou laprès administrasyon SJM-Ayiti/Solidarite Fwontalye nan komin Wanament soti jodi mèkredi 21 Septanm 2022 a, li eksprime endinyasyon l ak tristès li pandan l  kondane ak tout fòs li  gwo zak mechanste ak piyaj ki fèt nan lokal biwo a nan site Planto nan jounen 16 septanm  2022 a nan aprè midi.

SJM-Ayiti/Solidarite Fwontalye fè konnen se avèk dlo nan zye l’ap gade kouman yon pakèt moun ki fè tèt yo pase pou manifestan, moun biwo a abitye ede nan nivo l kapab, ap kraze epi pote ale tout sa ki nan biwo a. 

Responsab biwo Solidarite Fwontalye yo panse se kapab yon manipilasyon ki pouse popilasyon an aji konsa paske, selon sa yo di, enstitisyon an toujou devlope bon jan bon rapò ak moun nan kanton an kote l travay nan tèt ansanm pou devlopman kominote a, chèche mwayen pou fè dwa moun respekte ak triyonfe. Li toujou batay pou n gen yon sosyete kote tout moun kapab viv nan lapè ak nan Diyite. 

Solidarite Fwontalye raple, li se youn nan enstitisyon ki toujou prè pou akonpanye popilasyon an nan tout revandikasyon pasifik li yo epi ki jis nan chèche yon lavi miyò, nan respè youn pou lòt. 

SJM-Ayiti/Solidarite Fwontalye pwofite okazyon an pou l fè tout moun konnen 19 jen pase a ba li 23 lane nan kominote a kote lap akonpanye sila ki pi vilnerab yo nan sèvi ak defann migran yo, fanm ak timoun kap sibi tout kalite vyolans. Li kontinye pou l raple kontribisyon li nan ede agrikiltè ak kiltivatè yo, ti komèsan yo, nan fè pwomosyon pou pwoteje anviwònman, elatriye.

Yon lòt bò, dirijan yo raple Solidarite Fwontalye se byen ak patrimwàn tout moun paske benefisyè dirèk ak endirèk pwogram Solidarite yo anpil. Se plizyè dizèn, santèn ak milye moun li ede nan kominote a malgre l pa genyen gwo mwayen.

SJM-Ayiti/Solidarite Fwontalye fè konnen si tout aktivite l yo kanpe sa pra l genyen anpil konsekans sou lavi moun nan Nòdès ak tout lòt moun nan Peyi a paske Nòdès se yon kafou, yon pòt antre, yon depatman ki enpòtan anpil pou peyi a sitou nan relasyon komèsyal li ak Repiblik Dominikèn. Malerezman yo pa ba li enpòtans li merite. 

Responsab Solidarite Fwontalye yo pa jwenn mo pou yo kalifye sa kin pase a. Yo deklare, e nap site « lè yon moun deside fè piyaj ak kraze brize nan yon biwo konsa, kisa’w voye moun sila yo ki konte sou aksyon biwo a al fè ? Se ajenou ou mete depatman, se nan plis pwoblèm ou mete bèl kominote sa ak men m pwòp tèt pa w. »  

Nan sousi pou l akonpli misyon l epi kontinye akonpanye moun ki pi vilnerab yo pou pita pa pi tris, dirijan SJM-Ayiti yo deklare yap mete kanpe yon selil ijans pou kontinye travay la pandan yap panse ki oryantasyon e ki desizyon kap pi bon pou yo pran.

Malgre tout sa SJM-Ayiti viktim nan jounen 16 septanm  2022 a swit a manifestasyon ki te fèt nan komin Wanament, li montre bon jan volonte pou l kontinye travay avèk popilasyon an. Nan sans sa a, li voye yon gwo mesaj bay moun kap viv nan kominote a.

« Si nou vle travay sa kontinye fèt e biwo a toujou rete prezan pou ofri sèvis li e akonpanye kominote a, nou mande tout moun ki genyen bòn volonte yo ki genyen materyèl biwo a nan men yo (ti materyèl, gwo materyèl) pou pote yo vini prese-prese. »

Pi lwen, SJM-Ayiti/Solidarite Fwontalye mande moun ki konsène yo pou chèche yon fason kap bon pou yo, jis pou yo fè materyèl sa yo rive jwenn biwo a soti mèkredi 21 septanm pou rive dimanch 25 septanm 2022.

Dirijan SJM-Ayiti/Solidarite Fwontalye presize, moun yo kapab pote materyèl yo oubyen  remèt yo bay  yon moun ou yon gwoup moun ki vle ede travay la avanse pou pote yo pou nan biwo a. 

Nan finisman nòt la, SJM-Ayiti/Solidarite Fwontalye mande kolaborasyon tout moun pou l kapab kontinye misyon l nan kominote a jan sa te konn fèt avan nan relasyon bon vwazinaj. 

Otè : Philomé Mathieu

Jiris, Jounalis, Pwomotè Dwa Moun.