Nan okazyon selebrasyon “Jounen Mondyal Deklarasyon Inivèsèl Dwa Moun” 10 Desanm 2022 a, yon gwoup sitwayen nan Wanament te chita nan Lise Kapwa Lamò (zòn Sans) nan lide pou yo te kapab diskite sou divès kalite pwoblèm kap sakaje labil kominote a, epi rive mete kanpe yon gwo estrikti ki reyini plizyè sektè nan sosyete sivil la.
Li te 10 zè 40 minit lè rankont lan te kòmanse. Psikològ Spenceur B. Celestin ki tap jwe wòl moderatè te swete tout moun yo byenvini epi l tou kòmanse avèk pwosesis prezantasyon (endividyèl) chak moun.
Aprè seri prezantasyon yo, moderatè a te bay objèktif rankont la kote tout moun te anbwase lide a. Philomé Mathieu, ki te la kòm reprezantan Laprès, te jwenn posiblite pou l te eksplike patisipan yo kisa Sosyete Sivil ye, ki wòl li, ak ki ansanm de moun ki ka fè pati de Sosyete Sivil.
Eksplikasyon li yo te valide, ou ta di se yon sesyon fòmasyon li tap fè. Li te pran anviwon 10 minit pou rive eklèsi patisipan yo sou kesyon Sosyete Sivil yo toujou tande pale de li a.
Tou swit aprè, moderatè a, Spenceur te deside pataje eksperyans li te fè nan Fakilte Etnoloji nan pòtoprens avèk patisipan yo.
« Se yon Fakilte ki bay anpil moun ki souvan ap batay kont move ajisman otorite yo anvè mas pèp la Men, jan de batay sa yo pa janm rive abouti koz anpil minis ak lòt gwo chabrak yo nan pouvwa an plas la toujou chwazi yon ti pati nan moun kap fè revandikasyon yo pou ba yo kòb oubyen ba yo Bous Etid pou febli mouvman an."
Psikològ la te pale konsa, yon fason pou l te raple tout moun se nan yon batay ki pa gen pri, ki pa achtab nap antre jounen jodi a.
« Se yon moman konsa mwen tap tann. Lè m patisipe nan jan de rankont sa yo, mwen toujou santi m konfòtab » sa se deklarasyon Enjenyè David Jn-Baptiste ki te pran lapawòl nan okazyon an.
Mèt Denis Jean-Baptiste te kritike sitwayen ki di yo se Sosyete Sivil nan Wanament. Selon limenm, moun sa yo pa rèspèkte ansanm prensip pou yon moun ta fè pati yon Sosyete Sivil.
Sou bò pa li Sanba Joe The Best ki se yonn nan reprezantan sektè Vodou a nan rankont sa a, te deklare li santi l kontan pami nou, li pwofite mande pou envitasyon yo kontinye fèt. Pilwen, Joe The Best te pwopoze pou n envite lòt moun ki di yo se Sosyete Sivil Wanament la pou vin ranfòse mouvman sa ki pral pote tout revandikasyon popilasyon an.
Madam Cherenfant Mombetha, reprezantan gwoupman fanm yo, sèl grenn fanm ki te patisipe nan premye rankont sa a, te pwopoze pou genyen bon jan emisyon sansibilizasyon ki fèt nan vil la.
« Mwen pwopoze pou n fè yon emisyon radyo kote n kapab eksplike popilasyon an kisa ki Sosyete Sivil la tout bon vre, paske li pa nòmal pou chak grenn moun ap di yo se Sosyete Sivil. »
Fòk nou di, tou swit aprè tout entèvansyon sa yo, moderatè a te pwopoze pou n diskite sou plizyè pwopozisyon ki te fèt avèk definisyon nan lang franse pou te rele estrikti nou deside mete kanpe a. ROSCO - FOSCO - POSCO.
Aprè yon ti diskisyon, nou te pase nan etap vòt ak men leve pou chak non yo. Finalman, tout patisipan yo te vote FOSCO (Fédération des Organisations de la Société Civile de Ouanaminthe) kòm non Ofisyèl estrikti sila a.
Nan menm moman sa, yo te wè nesesite pou te fòme yon komite pwovizwa (11 manb) avèk reprezantan divès sektè ki te prezan ak sila yo ki te motive absans yo, men ki te rive enfòme de aktivite sa a pandan dewoulman rankont lan. Nap presize, komite a rezève plas pou kèk sektè ki pat gen posibilite reponn a envitasyon an tankou Legliz, Moun Andikape yo avèk Chofè Taksi Moto yo.
Pami sektè ki te patisipe nan rankont lan, nou kapab site : Mouvman Fanm yo (Platfòm Jan Nòdès), Laprès, Peyizan/Agrikilti, Vodou, Ouvriye, Ansèyan, Espò, OKB, Andikape yo, Antreprenè yo, elatriye. Me lis moun ki nan komite sa a ki manke 2 manb.
Kòdonatè : Celestin B. Splendeur (OCEC)
Vis-Kòdonatè : Jn- Baptiste David (Laprès)
Responsab Relasyon Piblik : Chérenfant Mombetha (Reprezantan Fanm Nòdès)
Sekretè : Philomé Mathieu (Laprès)
Sekretè Adjwen : Ednel Fils-Aimé (Ansèyan)
Delege : Joseph Gary (Espò)
Delege : Pierre Ashma (Peyizan/Agrikilti)
Delege : ………………………..(Fanm nan Legliz)
Konseye : Julien Geffrad (Vodou)
Konseye : Jean Rodelin (Ouvriye).
Trezoryè : …………………….. (Fanm pami Andikape yo).
Fè presyon sou sou otirite nan Leta a pou yo rive fini pwojè enfrastrikti yo tankou Plas Piblik Wanament, Pak Jwèt Gaya, Plas devan Simetyè a, elt., batay pou popilasyon an jwenn bon jan swen sante, dlo potab, sekirite, elktrisite, manje ak edikasyon, gaz selon evolisyon mache entènasyonal la, batay pou fè respekte dwa ak diyite ouvriye yo avèk migran yo, se kèk pami pwen FOSCO pral batay pou yo nan benefis kominote a.
Nap raple, FOSCO (Fédération des Organisations de la Société Civile de Ouanaminthe) se pa premye estrikti ki monte nan komin nan avèk misyon pou fòse Leta fè travay li epi defann tout sa ki nan enterè kolektivite a nan kad travay li kòm Sosyete Sivil.
Yon dosye nap swiv…
Otè : Jameson Génard
Repòtè, jounalis Fotograf Liberté Infos
Aucun commentaire:
Enregistrer un commentaire