AYITI-NÒDÈS-WANAMENT//ENFRASTRIKTI : POPILASYON AN BEZWEN KONNEN KILÈ PLAS PIBLIK WANAMENT LAN AP FINI ?

Daprè dènye enfòmasyon ki rive jwenn Redaksyon Jounal an liy Liberté Infos Jodi Mèkredi 16 Novanm 2022 a, travay konstriksyon Plas Piblik Wanament la pral redemare rapidman nan jou kap vini la yo.

Selon enfòmatè nou an, Direktris TPTC a nan Depatman Nòdès la, Enjenyè-Achitèk Hordelyne Thérèse ta va fè kwè se pwoblèm Gaz avèk mouvman lari a ki te oblije l kanpe. Pliske tansyon lari a bese, otomatikman li jwenn Gaz la nan ponp yo nan kanton an, chantye a pral redemare a tout vitès. 

Direktris la te ranplase nan pòs sa a Enjenyè Adrien Renaud nan mitan ane 2022 a. Fòk nou di, enfòmasyon yo ta fè kwè Enjenyè Adrien te gentan depanse anviwon 20 milyon goud nan Kad pwojè Sila. 

Pa bliye, Enjenyè Hordelyne te anonse depi plis pase 3 mwa sou yon estasyon Radyo nan Wanament li genyen 13 milyon goud ki deja a dispozisyon l pou l kontinye pwojè rekonstriksyon Plas la ki ta dwe deja inogire. 

Nap raple, ansyen Minis Planifikasyon ak Kòperasyon Ekstèn nan Mèt Aviol Fleurant te anonse sou Paj Facebook li nan dat 28 Septanm 2020, genyen 67 milyon goud ki disponib nan Inite Konstriksyon Lojman ak Batiman Piblik (ULCBP) pou rayalize travay Konstriksyon Nouvèl Plas Piblik Wanament lan. 

Fòk nou di tou, pwojè sa te rive fè anpil deba kontradiktwa nan mitan popilasyon wanamentèz lan avan menm li te kòmanse. 

Genyen yon premye gwoup moun nan kominote a ki te swete Leta Ayisyen sèlman fè yon pase men ladann, kidonk, fè yon Amenajman nan Plas Piblik la olye yo kraze l pou fè yon lòt. 

Genyen yon dezyèm kategori ki te pwopoze pou yo Konstwi yon dezyèm Plas pou Wanament nan yon lòt espas olye yo detwi bèl zèv sila Levy Prophète, ki se yon pitit lakay te konstwi avèk pwòp mwayen li pou Wanament.

Finalman, Patizan ak Senpatizan Minis Planifikasyon epòk la, Mèt Aviol Fleurant, ki limenm tou se pitit Wanament, te bay preferans yo ak opsyon kraze Plas Piblik la pou te ranplase l pa yon lòt Plas Modèn ki ta sipoze raple nou Wayòm Rwa Anri Premye (Kristòf) paske Wanament se vil Kristòf te pote nan kè li menm si se nan Vil Okap ak Milo li tap Renye. 

Kilè Plas Piblik Wanament la ap fini? Eske Nòtredam ap pase yon 3e Fèt Patwonal san Plas Piblik la nan Wanament? Eske nan foto pou moun Wanament kontinye montre Plas Piblik komin nan? Antouka, sou tout rezo sosyal yo,  se ansanm kesyon sa yo sitwayen Wanament pa sispann poze sou dosye a.

Nap raple, pwojè konstriksyon Plas Piblik Wanament la te pran gwo kou nan kad mouvman leve kanpe ki tap fèt nan mwa Septanm 2022 pase a kote popilasyon an te pote ale tout Tòl ak Bwa 2x4 ki te klotire espas la. Kounyè a, nan plas moun, se Bèf kap taye banda nan espas la Plas Piblik Wanament la.

Otè: Philomé Mathieu

Jounalis, Jiris, Pwomotè Dwa Moun