Wanament-Konferans-deba : Pwoblèm ensekirite, agrikilti ak elektrisite, Moïse Jean-Charles deja genyen solisyon yo.

Lidè Pati Politik “Pitit Desalin” nan, Mesye Moïse Jean-Charles te patisipe nan yon gwo konferans deba Mouvman Jenès Pitit Desalin tap òganize 14 Dawout 2022 a nan oditoryòm Enstitisyon Jan Pòl II nan komin Wanament. 

Nan okazyon an, ansyen senatè depatman Nò a pat mete dlo nan bouch li pou l te denonse ak tout fòs li konpòtman otorite san vizyon ak ensousyan kap dirije peyi a. Libète, sante, manje, sekirite ak lwazi pou tout ayisyen, se kèk pami ekzijans li te pwofite fè a dirijan yo nan leta a, nan kad entèvansyon li.  

Yon lòt kote, lidè politik ayisyen an Moïse Jean-Charles lonje dwèt li byen long sou move jesyon otorite anplas yo li di ki lakoz anpil pitit peyi a kouri kite l pou al bouske lavi ak lapè anba gwo imilyasyon nan peyi letranje. 

Moïse Jean-Charles kontinye pou l di li deja chita pale avèk dirijan plizyè peyi nan mond lan tankou Larisi, lachin, Venezyela, nan sousi pou yo kapab ede l rezoud divès pwoblèm kap sakaje labil peyi Dayiti. 

Lidè Pitit Desalin nan ki kwè fòk eleksyon rive fèt pou renouvle pèsonèl politik la nan peyi a, pwomèt li pral itilize enfliyans li pou l pote solisyon a pwoblèm elektrisite, agrikilti, sekirite, elatriye, lè l rive pran pouvwa a.

Dieusel Pierre /Jounalis kòrespondan/Etidyan CEPCOM