Nòdès/Edikasyon:Pwofesè nan lekol nasyonal Olivert Vincent pwomèt pou bloke inogirasyon nouvo lokal etablisman sa si yo pa jwenn lèt nominasyon.

Jounen Madi 31 Dawout 2022 a,plizyè pwofèsè kap travay nan lekòl Nasyonal Olivert Vincent nan abitasyon Batis ki twouve l nan seksyon kominal Jandenant sou komin Wanament fè gwo mouvman pwotestasyon pou egzije Leta pou nome yo. Pwofesè sa yo ki gen 9 ane ap travay nan nivo premye ak dezyèm sik fondamantal ki poko janm nome rive bloke wout ki relye Wanament, Karis ak Mont- òganize(...) nan nivo lokalite Batis anfas etablisman lekòl la.

Prensipal objèktif mouvman revandikasyon sa yo se pou mande Minis Ledikasyon Nasyonal la pou nome yo e peye yo 9 ane travay yo. Pwofesè yo pwofite voye yon mesaj klè bay Minis Ariel Henry ak anpil lòt otorite nan ministè edikasyon an  ki ta gen pou vini nan inogirasyon nouvo lokal etablisman sila demen Jedi 1e septanb 2022 a.

 Pwofesè yo ki fache tankou kong lanmè pandan mouvman sa, fè konnen lokal lekòl la pap kapab inogire e ouvè pou resevwa elèv, toutotan Minis Ledikasyon Nasyonal la pa rive nome yo epi peye yo 9 ane aryere salè yo.

Otè: Thoribe Dieufort 

Jounalis kòrespondan Liberté-Infos/Etidyan CEPCOM.