Majistra titilè komin Fòlibète a, Mesye Étienne Louis-Jacques alyas Tibouki, ki tap reponn kesyon Jounal Liberté Infos yè Madi 12 Jiyè 2022 a, deklare li fenk monte yon estrikti kap pèmèt li kwape fenemèn ensekirite a nan tèt kole avèk lapolis ak lajistis.
Majistra Tibouki fè konnen li deja pibliye yon kominike kote l pran divès mezi pou rive kontwole tout ale vini kap fèt nan komin lap dirije a. Li kontinye pou l di, objektif li se pèmèt tout paran anndan vil Fòlibète kapab voye pitit yo regle nenpòt bagay pou yo san kè sote nan nenpòt lè. Li fè konnen kominike sa a fè plizyè ekzijans a tout etranje (moun ki soti lòt kote) ki vle vizite vil Fòlibète. Pa egzanp, apati 11h nan aswè, tout etrante oblije mache avèk pyès ki bay bon jan enfòmasyon sou yo, sinon lap remèt yo bay lapolis jidisyè pou swit legal yo.
« Apati 11h nan aswè, tout etranje ki vle vizite vil Fòlibète dwe mache avèk kat idantifikasyon nasyonal yo, yon pyès ki di byen klè kilès yo ye, ki adrès yo. Moun sa yo dwe di nou ki rmisyon yo pou komin nan ak ki kantite tan oubyen jou yo vin pase ladann. Si nou jwenn yon moun ki pa gen pyès pou idantifye l, nap remèt li bay lapolis jidisyè pou swit legal yo. Paske tout sa nap fè dwe konfòm avèk lalwa.»
Pilwen, Majistra Tibouki fè konnen akoz vil li a piti, nenpòt lè li ye a, lap akonpanye tout etranje li jwenn nan vil la nan lè 11h nan awsè pou mennen yo nan otèl oubyen tout lòt espas kote yo di l yo prale. Avan etranje yo kite vil la, Majistra kontinye pou l di moun sa yo oblije pase nan Meri a pou yo siyen yon dokiman kote yap anrejistre tout enfòmasyon ki nesesè tankou: kilès yo ye, ki adrès yo ak nimewo telefòn yo, elatriye.
« Mezi sa yo pran nan sousi pou pèmèt chak sitwayen, chak sitwayèn kap viv nan komin sa a kapab fè tout aktivite yo san pwoblèm, epi evite vil la inonde avèk vag ensekite a » sa se deklarasyon Majistra Tibouki.
Yon lòt bò, Majistra voye anpil flè bay komisè Gouvènman nan depatman Nòdès la, Mèt Enaud Zéphirin li di ki se yon nèg serye ak sevè kap fè yon gwo travay nan kominote a.
« Erezman nou gen yon komisè Gouvènman serye ak sevè nan depatman Nòdès la kap bay jistis a moun ki merite jistis. Jistis la ekilibre jiska minit kote map pale a. »
Majistra a raple se nan kad plan travay chèf Pakè Fòlibète a, Mèt Enaud Zéphirin genyen pou komin nan ki pèmèt li monte estrikti pa l la. Li kwè li enpòtan pou l akonpanye komisè a nan demach sa yo ki ale nan benefis kominote a.
Konsènan relasyon Meri a avèk lapolis, Majistra Étienne Louis-Jacques fè konnen li pa kapab plenyen ditou. « Mwen pa gen mo pou dekri kolaborasyon lapolis avèk Meri a. Nenpòt lè nou gen bezwen yo, lapolis toujou disponib pou Meri a. »
Majistra a kwè pwoblèm kouran an kontribye nan fenomèn ensekirite a. Li kritike konpòtman lòt Majistra li di ki plis kwè nan fè chèlbè, pran plezi olye yo konsakre tan a travay popilasyon an te konfye yo.
Pou fini, Majistra Étienne Louis-Jacques voye jete byen lwen tout enfòmasyon ki ta kwè li joure yon anplwaye Meri Fòlibète ki te mande l 50 goud poutèt li te grangou. Li te tou pwofite raple kòman li kolabore avèk li malgre krab la pa gra nan komin li an.
« Sa se voye monte. Se difamasyon kap fèt sou mwen. Pa bliye se sou mango mi yo tire wòch. Epi tou, si chalè vant manman m pat touye m, se pa ti chalè bouch moun ki kapab touye m. Komin mwen an pa gen resèt, se vre, men mwen toujou jere kolaboratè m yo. Mwen tèlman donab, yo rele m lòm enfatigab. Mwen Majistra, mwen chofè, mwen mesaje, mwen tout an menm tan pou m fè komin mwen an mache. Lè Machin Meri a anpa-n, se 2 moto 3 wou mwen pran a 4000 goud, mwen asiste mesye kap pele fatra yo, apre mwen mennen yo manje, jis pou m kenbe vil la pwòp.»
Nap siyale, Majistra Étienne Louis-Jacques sot resevwa yon Plak Onè ak Merit nan men Konpayi NATCOM pou fason li kenbe flanbo lapwòpte a nan vil Fòlibète.
Pierre Dieusel: Jounalis/Kòrespondan
Aucun commentaire:
Enregistrer un commentaire