Wanament-Edikasyon: Baryè Louvri, Pèsonèl divès Lekòl (direksyon ak jeran/sekirite) Disponib, okenn Elèv ak Pwofesè pa mete Pye…

Lendi 07 Novanm 2022 a, yon repòtè jounal an liy Liberté Infos te fè kèk virewon nan lari a kote l te gen chans vizite kèk Lekòl nan lide pou l te konstate evolisyon sitiyasyon ki gen a wè avèk Rantre Lekòl la nan Komin Wanament. 

Malerezman, jan anpil moun kapab remake sa, malgre tout angouman ki genyen nan mitan popilasyon an pou voye pitit yo lekòl, se toujou menm rezon yo ki lakoz enstitisyon eskolè Prive kou Piblik pa rive fonksyone nan vil Wanament jounen Jodi a. 

Lavi chè ak pwoblèm gaz la, se pa prensipal rezon ki fè lekòl yo pa fonksyone nan Wanament. Selon kèk temwanyaj, se pito gwo menas kap peze sou tèt pwotagonis yo (elèv, pwofesè ak direksyon lekòl yo) kote machann dezagreman yo pwomèt pou atake yo ki fè elèv ak pwofesè yo pa vini nan etablisman yo.

Fwa sa a, se lapèrèz ki anpeche timoun yo pran chimen lekòl. Nou konstate genyen bon jan preparasyon ki fèt pou akeyi timoun yo. Pèsonèl divès Lekòl tankou (direksyon ak jeran/sekirite): Ekstèna Senfranswa Dasiz, Enstitisyon Jan Pòl II, Ozwal Diran, Kolèj Kiskeya, elatriye te sou plas ak baryè yo byen louvri ap ret tann elèv ak pwofesè yo.

Kesyon nap poze, eske lekòl kapab sèvi zouti politik pandan nap klewonnen timoun yo se avni peyi a? 

Eske Polis Nasyonal la pa ta kapab fasilite rantre lekòl la si yo vle rete fidèl a misyon yo kise Pwoteje ak Sèvi?

Eske se chak paran ki ta dwe deside bay tèt yo mwayen pou yo asire sekirite pitit yo pou vin mennen yo lekòl epi rete siveye yo? 

Eske se sèl lekòl kriz peyi a fè enpak sou li ki koz tout lòt enstitisyon yo ap fonksyone malgre tou?

Eske legliz yo, Bank yo, Ladwann, Imigrasyon, ONG yo, Disko yo, ONA, CODEVI, ak tout Biznis nou pa site yo pa ekziste nan menm tèritwa ak lekòl nou yo ki koz yo kontinye ap fonksyone? 

Eske gwoup ki rele tèt li Sektè Jenès la pa ta dwe batay pou fasilite rantre lekòl la, lè nou konnen se gras ak fòmasyon yo ki fè yap mande entegrasyon yo nan vi politik ak ekonomik peyi a?

Antouka, se yon Reyalite Dwat e Gòch chak Ayisyen oblije viv nan Fim Lavi a nan peyi Dayiti…

Otè: Jameson Génard

Jounalis Repòtè