Malgre difikilte fonksyònman, pèsonèl Biwo Leta Sivil la nan Wanament kontinye sakrifye yo pou bay popilasyon an satisfaksyon.

Ofisye Leta Sivil la nan komin Wanament, Mesye MOMPOINT Antonio ki tap pale nan  mikwo Jounal an Liy Liberté Infos maten Lendi 11 Jiyè 2022, fè konnen Biwo lap dirije a ap byen fonksyone nan moman sa a gras ak konpreyansyon tout kolaboratè li yo.

Ofisye MOMPOINT deklare malgre biwo a pa gen mwayen nesesè, malgre kolaboratè yo ap travay nan kondisyon difisil, yo deside bay popilasyon an bon jan sèvis. 

« Pou n satisfè demand popilasyon an, nou travay nan tèt kole avèk divès sektè nan kominote a tankou : otorite lokal yo (Kazèk ak Azèk yo), Ougan, Manbo, lidè kominotè yo ak lidè relijye yo (Pastè ak Pè yo). Se sa ki pèmèt popilasyon an jwenn gwo satisfaksyon nan travay la jounen jodia. Gras ak estrateji sa a, nou rive livre dokiman yo a tan (Batistè, Ak Maryaj, Ak Divòs, Ak Desè) epi tou nou voye Rejis yo ale a tan nan Achiv Nasyonal. » 

Yon lòt bò, Ofisye MOMPOINT fè konnen biwo Leta Sivil la ap fè fas ak gwo pwoblèm materyèl. Men, kòm responsab, li degaje l kou mèt Janjak pou l bay popilasyon an sèvis. Yonn pami pi gwo difikilte biwo a rankontre se long distans li pa rapò a moun kap viv Jandenant, Akildèpen, Savannlong ki souvan neglije vin deklare timoun yo. Malgre Leta pa bay mwayen pou sa, se ekip biwo a ki konn deplase al jwenn moun yo pou ba yo sèvis.

« Lè Leta poko bay nou Rejis, se nou ki oblije achte Rejis pou n bay popilasyon an sèvis. A koz lavi chè ak pwoblèm gaz la, kous moto byen chè. Malgre Leta pa ba nou mwayen nesesè, se nou ki konn deplase al bay popilasyon nan zòn ki lwen yo sèvis.» 

Pou fini, Ofisye MOMPOINT raple Batistè se yon dokiman popilasyon an dwe jwenn gratis. Li kontinye pou l di, akoz biwo a pa gen mwayen pou l fonksyone, moun yo konn bay 50 goud kòm kontribisyon pou ede ekip la fè travay la.

Pierre Dieusel

Jounalis/Korèspondan